回想起十幾年前，當時好流行大家口中常會講起嘅 「MP3機」。 而我亦同好多喜歡音樂嘅朋友一樣，總會有部「MP3機」傍下身。往後嘅日子，我就耐不耐會換一部MP3機，直到大概2015年左右我留意到呢個世界上原來有樣好似仲勁d嘅野，叫做DAP！我當時只係知佢比我用開嘅 MP3機貴好多，而且個樣又好勁咁。所以我就選購左一部當時都好hit嘅日本牌子DAP，正式展開我玩digital audio player嘅旅程。
由於當時開始對耳機同DAP產生興趣，我自不然會留意下唔好牌子同型號嘅耳機同DAP啦！當時留意到Astell & Kern呢個牌子，因為聽人講係來自iRiver，一個曾經推出唔少音樂player而我又認識嘅牌子。當時有朋友向我介紹AK100，但由於當時中毒未太深，而且價位唔太親民，所以好快已不了了之！但AK呢個牌子就從此注入左喺我腦內，最記得我行親HMV都會用一個帶有葡萄嘅神情望住堆AK demo。
經過幾年嘅時間，我已擁有過不下十部唔同牌子唔同風格嘅DAP了！多數都係國內同日本牌子，亦經常買完又賣，賣完又再買。用到某隻日本牌子嘅DAP，好似冇咩味道又冇咩力水咁；又聽人講國磚大力d，應該比較啱我！所以又買過好幾部初至中階嘅國磚。當然有部份對我黎講都係啱聽又好聲嘅，但又好似唔係每對耳機都夾到。有時對應某d耳機幾好聲喎，但某一d耳機即刻變得好尖好薄好奇怪。之前試聽過SP1000同埋SP2000；呢兩部係好聲，不過對我來講太斯文了，未算係我杯茶。當然價錢都會係我考慮嘅因素啦！一切劇情發展直至SE200嘅出現就改寫左了！
對SE200嘅好感來自佢有兩組聽感完全唔同嘅DAC 解碼，可以因應唔同耳機同曲風而決定聽邊組DAC；而且價錢上比旗艦型號容易接受好多。講返聲先，我個人係比較喜歡ESS呢一組，因為我比較著重音場同動態！ESS呢一組聽band或EDM等層次較多嘅音樂係無得輸嘅。不過當聽到人聲為主，較soft同編曲較簡單嘅歌曲時，AKM呢邊又會有種好療癒嘅感覺。最令我驚喜嘅係有一對本身(對我來講) 唔算太好聽嘅耳機，用SE200一聽落去完全化腐朽為神奇！點解好聽左咁多嘅？唔止係好聽左，仲要係好好聽！慢慢我明白到，有時都要有好嘅device先可以將一對耳機發揮得更好，有時真係缺一不可嘅！再仔細聽多左一陣之後，我嘅決定係…. “Shut up and take my money!!!” 成功課金，開開心心。而家SE200已經變左我最常用嘅一部DAP了；或者都算圓左我多年嘅夢想啦。
