歷時兩年，SP2000正式喺2019年面世。作為Astell&Kern 嘅新旗艦，AK依舊將當年SP1000嘅待遇套用到SP2000，應用兩粒旭化成嘅新旗艦Chipset AKM4499作為核心。對比起SPK延用AK380嘅設計，SP2K唔再採用碳纖背板，反而以外殻物料代替。以CU黎講，DAP全身都以銅殻包裹。說實話，我反而比較鍾意碳纖背板，始終係金屬背板，手感上無碳纖玻璃背板咁滑溜，而且亦會令重量有所增加。
由SPKM開始，AK開始設計新嘅放大電路，希望解決到大家垢病已久嘅推力問題。SPKM基於SPK下，以細機身之姿到達4.2Vrms。而SP2K再下一城，將推力增大到6Vrms，可以話係推力倍增，唔再好似AK380、SPK咁孭住部Amp Pack行街。雖然SP2K唔再孭住Amp Pack，不過重量亦都黎到歷代最高。說實話，SP2K拎上手真係非常墜手，拎住個半鐘其實手臂已經有少少痠軟。呢一點可以話係SP2K嘅一個缺點。
雖然可視嘅變化唔算多，但係聲音上嘅變化反而有少少意外。作為旗艦銅機，暖、厚、慢可以話係已經深刻喺家族基因之中。但係SP2000嘗試扭轉呢個命運。作為銅機，即使SPK開始沖淡CU嘅Stereotype，但係依舊聽得出CU濃烈個性，只係相比AK380無咁強烈。但係黎到SP2K，銅機嘅定形其實不再。初聽之下，聲音嘅改變都可以話截然不同。人聲雖然保有過去嘅色彩、感情，但唔再如過往般厚重。聲音聽落去比較輕盈，唔再拖泥帶水，即使聽快歌都唔算慢聲。過往CU偏重中低頻，令到高頻會稍暗，但係今代嘅高頻明顯係相對明亮。即使未聽SP2K SS無法比較兩者嘅高頻，但係比起前兩代CU嘅改變可以話係好大。但係低頻依舊保有舊有嘅色彩，比較彈性同有打擊感，只係下潛表現一半。由此可見，三頻嘅分佈係相對平均。
可能係受惠於推力增加嘅影響，背景嘅表現亦有所改善。雖然要比結像、分離度、定位，SP2K CU依舊唔算好強，但係對比SPK同AK380可以話係強化不少。而音場亦更開揚，橫向音場更廣闊，只係縱深嘅表現無得到大多強化。雖然SP2K CU基於SPK CU做出不少進步，但係有一點我係覺得比較可惜，就係SPK曾經有嘅泛音、聲尾，反而SP2K收緊返，聲音上比較緊緻，無左SPK嗰種華麗感。
FINAL A8000 (Dita The Truth Silver Cable +Final Type E):
由於SP2K推力翻倍，直推黎講真係輕鬆好多，音量只係扭到50左右已經足夠。對於人聲小品嘅handle，CU不嬲都勝任有餘。不過相對起SPK CU組合，人聲嘅企位拉得更前更突出，結像亦有稍為再放大，非常spotlight 人聲。例如，何韻詩 - 《韻律泳》，主唱非常突出，對於人聲細節，不論氣音、呼吸、齒音都表露無遺，呢一點係以往CU配合A8000做唔到嘅一點。
另一點非常驚訝嘅就係CU嘅速度感、爽感。雖然SP2K CU依舊不如SPK SS般乾脆、快速，但係對Rock、Band Sound有相對以前有唔錯嘅表現，啦，呢一點又係過往CU做唔到。例如，Beyond - 《我是憤怒》， CU都可以表達出歌曲嘅激情，甚至電結他嘅演繹亦尚且算得上乾脆有力。儘管尚有保留CU樂器無咁分明嘅特點，但係意外可以帶出搖滾風格。
雖然SP2K CU比起過往無咁「立」，但係面對撥弦樂器依舊係弱點。例如2007原音精選嘅 《十面埋伏》，雖然A8000嘅速度跟上，但係CU無能夠好好表現出撥弦嘅力度、乾脆，令到琵琶好似Lur埋一住，由其當唔同琵琶合奏時，反而會有少少炒埋一碟。
FIR M3 (Dita Oslo + Azla Xelastec):
受惠於Tactile Bass嘅加乘，配搭CU聽Bass永遠都好正、好有質感，呢一點係FIR耳機嘅配搭SP2K CU嘅優勢。佢嘅低頻唔會好擁腫，反而係快速但係充滿打擊感同下潛嘅細節。例如《Guitar Calling》- 《刺客》，劉以達以電子樂器同電結他重新演繹，電子樂器所製造嘅低頻非常有打擊感，但亦唔會過火而遮住電結他本體。電結他雖然唔稱得上凌厲，但係感受到緊張氣氛嘅營造，令人非常投入其中。
M3本身嘅音場頗為狹窄，令到好多時樂器嘅擺位會比較埋身同大粒，容易有壓迫感。但係因為SP2K本身横向音場嘅開揚，反而令M3容易呈現置身其中嘅包圍感。
SP2K CU相比過往嘅銅機個性無咁濃烈，但係亦因為呢點失去左過往銅機對錄音高包容嘅優勢。始終今代無咁厚聲，對薄聲嘅錄音會顯得無咁對味。例如之前提及嘅容祖兒，《怯》係其中一首人聲比較薄、虛嘅歌曲。由於M3將人聲拉出，反而會更突顯出錄音嘅缺點。
CA Andromeda 2020 (京線 + Azla Short-light):
推力加大嘅後果往往對靈敏度高嘅耳機唔友善。即使係AK，依然難逃仙女對於底噪嘅偵測。但係不得不說，再對比AK380同SP1000 Amp後，AK算係喺力與靜之間攞到平衡。如果你扭到音量歸零，底噪依舊係有，只係真係好微弱，微弱到較高一格已經聽唔清底噪嘅騷擾。對於清唱或者背景簡單嘅曲目可以話係難得嘅乾淨、寧靜。例如《One I love》，前半段嘅清唱唔單止背景清淨，而女聲嘅表現亦帶有飄逸同甜美，唔會因為口型太大而過於放大齒音嘅問題。
過往喺仙女夾銅機，我都會話銅機令仙女下凡，拉返落黎中低頻。雖然以往夾銅機嘅人聲比較厚潤，但係亦犧牲左仙女本身高頻嘅優勢。而今代嘅SP2K明顯可以保留到仙女本身嘅優勢，由此可見，今代CU真係輕手好多，令仙女唔會走向天壇座嘅方向。
SP2K CU夾上仙女可以話係一個幾特別嘅組合，可以話係互補但又唔會相互抵銷嘅組合。除左高頻飄逸嘅保留，人聲亦帶有少少銅機嘅音樂感，聲音唔會過於冰冷。而低頻亦有所補足，且唔會影響三頻分佈，令低頻變得肥大擁腫而拖垮中高頻。當然，低頻嘅表現只係比原本打擊感大力左，喺下潛同量感方面就舞無太多增長。呢一點反而會係M3更明顯。
作為SP2K嘅頭陣，CU嘅改變都算得上脫胎換骨。撇除過往CU嘅定形，SP2K再一次話比大家知CU都可以唔慢聲、唔模糊，成個感覺反而似係4成SS再溝6成CU而產生嘅風格。對於鍾意銅機嘅味道但係抗拒慢聲嘅人，SP2K CU可以話係更接近理想嘅聲音。怪唔之得大家都話CU同SS嘅距離拉得更近。
#ThrowbackThursday #AstellnKern
